Avighljitorlu (simenlu) a oilor, cându pascu prit muntsâ, s-cljeamâ picurar; pri ningâ aesti sh-da numa di uear. Cându pashti mash oi, fârâ ca s-hibâ mintiti cu alti prăvdzâ; mâtricar, s-clejeamâ atumtsea cându pashti mâtritsili sh-stirpar, cându aveaglji oili stearpi. Tru mardzini, s-cljeamâ nutinar, cându pashti noatinji ică noatini. Oili tsi pashti un picurar s-cljeamâ, cu unâ numâ, cupii ică turmâ. Loclu iu s-mulgu oili s-cljeamâ stani ică mandrâ, sh-atsel iu armân picurarlji noaptea s-cljeamâ câlivâ i câshari. Atsel di picurari cari adarâ cashlu, umtul, urda, ghiza sh-alanti s-cljeamâ baci i câshar.
Ca s-afireascâ oili di zulăchilji di prit muntsâ, picurarlji au cu nâshi deadun, cama multsâ cânj bârbats cari nu li-alasâ sâ s-aproachi. Picurarli cântâ cu flueara, oili pascu ningâ nâshi sh-njeilji ansar lishor deanvârliga a mamilor a lor; iara cânjlji, avigljitori cridintsioshi, shed pi ningâ turmâ sh-ciulescu urechilji la atsea cama njicâ vreavâ tsi avdu. Un câni bun easti ca sh-mâna ndreaptâ a picurarlui.
Treaca a banâljei picurâreascâ easti di atseali cama mushatili. Picurarlji suntu amiradzlj a pâdurilor.