De Hitzestoffel war Schuster in Johrmark. E guter Schuster, bis, ja bis es Preisleistungsverhältnis uf mol nemmi gstimmt hot. Schicksal, kennt mer son, weil de Schuster selwer wor an der forr sei Schusterei fast lebensbedrohlich Situation gar net Schuld.

De Hitzestoffel war immer bemieht, e onstänniche Preis forr sei Reprature an de Schuh, asso Halbsohle, neie Eise uf die Absätz nahle, un was merr halt alles a’me Schuck so repreere kann, zu verlange. Schließlich hot er jo sei Landsleit gekennt un gewisst, dass ah die net im Geld schwemme. Als kundenorienteerter Handwerker, wie merr heit meecht son, hot er immer e menschliche Preis mit Kreid uf die neie Sohle vun de repreerte Schuh gschrieb. Un weil zu’me perfekte Service aah e Hauslieferung gheert, hot er die fertiche Schuh vun seim Sohn, em Gänsewilli, zu de Leit hoom troon geloss.

De Willi hot de Gänse-Zusatz in seim Nome ghat, weil er sich mol beim Gänsstehle verwische hot losse. Des hooßt awwer noch lang net, dass er e ungschickte Bu war. Im Gegenteil. Weil aus’m Verdienst vun seim ehrliche Schuster-Vatter kaum e richtiches Taschengeld rausgschaut hot, is em Gänsewilli net meh iwrich geblieb, wie sich selwer zu helfe. Annerscht hätt er sich so manches Gfrorne vum Gfrornemann an der Apothek net leiste kenne.

Um sich selwer zu helfe, hot er net meh wie e stick Kreit aus seim Vatter seiner Werkstatt gebreicht. Aus dee drei Lei uf der Schuhsohl ware schnell vier Lei gemach un schun war’s Geld forr e Gfrornes verdient. Verdient is do nateerlich de richtig Ausdruck, weil Schuhaustroon is doch aah e Arwet.

Freilich is die Gschicht irgendwann ans Tageslicht kumm, sunst kännt ich se doch do net ufschreiwe. Ob se allerdings aah irgendwelche Konsequenze ghat hatt, is net iwerliwert.


[Uf der Schanz, 2008]